📍Таттыкан Шайдан айыл аймагындагы Көк-Айдар айылында жашайт, 4 баланын энеси жана учурда үй кожойкеси.
БУУ ДАТПнын долбооруна тартылып, Курак тигүү курсуна катышып, учурда алдыга койгон максаттарын ишке ашыруу алдында турат.
«Айылыбыздагы активдуу аялдар аркылуу бул долбоор тууралуу маалымат алып, окууга катышып калдым», — дейт Таттыкан сөзүнүн башында.


🌷«Окууда айылдаш эже-сиңдилер менен чогуу курак тигүүнү үйрөндүк. Үйдө анча-мынча тигип жүргөм, бирок бул окуудан курактын көп сырларын билип алдым. Эң эле биринчи курак тигүүдө туура өлчөп, туура бычуу тигүүнүн эң керектүү эрежеси болот экен. Мурда көз өлчөм менен эле кыркып, бычып, тиге берчүмүн. Материалды туура өлчөп, туура кескенде материал дагы чыгымга учурабайт экен, тегиз болуп, тиккен буюмдар жакшынакай болупчыгат экен. Азыр мен башка бирөөлөрдөн да буюртма алып иштегенге өзүмө ишенип калдым.


Дагы бир айта кетчү нерсе, айылда аялдар көбүнчө жумушсуз, эмне менен алек болууну билбей, үйдөгү тирилик менен гана убара тартып жүрөт элек. Бул окууга келгенден кийин баарыбыз аракет жасап, жакшы үйрөнүп алалы деп тырышып окудук. Бир нерсеге кызыгуу пайда болуп, алдыга ар кандай пландарды койо баштадык. Келечекте буюртма алып иштейм деп даярданып жатам.


🌷Андан сырткары биз окууну аяктаганыбыз үчүн БУУнун Азык-түлүк программасы тарабынан 3 каптан ун, 15 литрден май алдык. Азыр үй-бүлөдө кыйынчылык жаралык турган кез болчу бул өтө чоң жардам болду. Ушул окууну уюштурган айыл өкмөтүбүзгө, азык түлүк берген уюмдарга чоң ыраазычылык билдирем», — дейт Таттыкан кубанычы жүзүнөн көрүнүп.