Орусияда 28-мартта Rossgram деп аталган жергиликтүү жаңы социалдык түйүн ишин баштады. Бул тууралуу долбоордун расмий сайты кабарлады.

Жаңы соцтармакты дүйшөмбү күндөн тарта ЖМКлар, өнөктөштөр жана инвесторлор колдоно баштаса, кийинчерээк ал блогерлер менен жөнөкөй колдонуучулар үчүн да жеткиликтүү болот.

«Rossgram’да сүйлөшүү, блог жүргүзүү, бизнес кылуу, жаңылыктарды жарыялоо жана өз долбоорун түзүү үчүн бардык мүмкүнчүлүктөр каралат. Тиркеме Android менен iOS’тун базасында иштейт», — деп жазылган сайттагы маалыматта.

Буга чейин Rossgram’дын түзүүчүсү интернет-маркетологу Александр Зубов экени кабарланган. Жакында жаңы социалдык түйүн ишке киргизиле турганы 14-мартта, орус бийлиги Instagram’ды бөгөттөгөндөн кийин жарыяланган.

Соттун чечимине ылайык, корпорация ээлик кылган Facebook менен Instagram соцтармактары Орусияда толук бөгөттөлгөн. Өлкөдө Facebook 4-марттан, Instagram 14-марттан баштап жабылган.

Ага чейин Орусиянын Федералдык коопсуздук кызматы (ФСБ) Meta корпорациясынын ишмердүүлүгүнө толук тыюу салууну талап кылган. ФСБнын өкүлү бул талабын компаниянын ишмердүүлүгү Орусияга жана анын куралдуу күчтөрүнө каршы багытталганы менен түшүндүргөн.

Мурдарак прокуратура Meta компаниясын «экстремисттик уюм» деп атап, америкалык компаниянын жабылышын соттук отурумда да жактаган. Алар Facebook менен Instagram түйүндөрүн өчүрүүнү сунуш кылып, байланыш каражаты болгону үчүн WhatsApp платформасына бул чектөөнүн тиешеси жок экенин айтышкан.

Орусияда Meta корпорациясына каршы соттук доолорго жана ага караштуу социалдык түйүндөрдү бөгөттөөгө анын контентиндеги эрежелер себеп болгон. Социалдык түйүндөрдө украиналык колдонуучуларга орусиялык аскерлерге карата зомбулук көрсөтүү жана каргап-шилөө тууралуу чакырыктарга уруксат берилген. Кийин компания русофобияга жана Орусиянын жарандарына жасалган дискриминацияга жол бербей турганын билдирип, жаңы эрежелер убактылуу киргизилгенин жана Украинанын аймагында гана мүмкүн экенин маалымдаган.